Fina Rey Beiró (1937-2025)
O pasado día 17 de setembro faleceu Fina Rey Beiró, vítima desa longa e cruel enfermidade chamada alzhéimer.
En primeiro lugar queremos agradecer todas as mostras de agarimo recibidas.
Fina Rey Beiró fundou xunto ao seu marido, José Mosquera Rivas, este obradoiro artesán alá polo ano 1971. Loitou desde o primeiro momento por manter viva a rica tradición reposteira da vila de Allariz, aportándolle un toque de innovación.
Desde a empresa que leva orgullosa seu nome queremos facervos partícipes do sentir amplo e profundo que nos percorre aos que portamos o seu legado.
A admiración á muller. Claro símbolo desa muller galega forte, rexa, agarimosa, afouta e boa.
O agradecemento á mestra que paseniño e caladamente conseguiu, cun sorriso larpeiro e sabio, transmitirnos a súa maneira de facer as cousas: ben.
E…
…que dicir da Nai?! Amor infinto. Tótem férreo e cálido de apoio incondicional. Exemplo, exemplo…, de loita ante cada atranco, de ledicia en cada instante, de discreta elegancia, de saber estar.
Amor tan grande como o baleiro que deixa ao noso arredor.
Non sabemos mellor maneira de encher ese oco que defender o seu nome, Fina Rei, como símbolo de todo aquilo que nos ensinou, na súa máxima:
facede as cousas ben.
